VSF

VSF skipulagði tvo stóra viðburði í september síðastliðnum, ráðstefnuna "Projects Across Borders" og var einnig gestgjafi stýrifundar IPMA (Council of Delegates).  Stýrifundurinn var í fyrsta sinn haldinn á Íslandi.  Stýrifundurinn heppnaðist afar vel og fékk félagið góðar þakkir fyrir frá stjórn IPMA fyrir gott skipulag.  Þátttakendur voru frá yfir 40 löndum.  Helgi Þór Ingason opnaði stýrifundinn með ræðu sem fjallaði um velgengni starfsins á Íslandi.  Helstu tíðindi frá stýrifundinum var kosning nýrrar stjórnar.  Roberto Mori frá Ítalíu var kosinn forseti samtakanna.  Brigitte Schaden var kosin formaður CoD.  Aðrar niðurstöður kosninganna má sjá á fréttasíðu IPMA.  Hefðbundið stjórnarstarf fór fram á fundinum.  Mikið starf fór auk þess fram í vinnuhópum tengdum vottun, Young Crew, staðlamálum (ISO21500).  Hópurinn fór út að borða saman tvö kvöld, á Silfur og í Fjörukrána.  Nokkrar myndir voru teknar við þetta tækifæri. 

Sjá fleiri fyrir neðan.  

Þann 23.september síðastliðinn fór fram á vegum VSF ráðstefnan Projects Across Borders þar sem Brigitte Schaden formaður IPMA kom fram sem heiðursgestur auk þess sem átta aðrir einkar frambærilegir fyrirlesarar stigu á stokk. Ráðstefnan var mjög vel sótt og höfðu ráðstefnugestir orð á því að viðburðurinn hefði heppnast vel í alla staði, VSF þakkar ráðstefnugestum, styrktaraðilum, fyrirlesurum og öllum þeim sem að viðburðinum komu fyrir sitt framlag.

Þann 23.september næstkomandi mun VSF standa fyrir haustráðstefnu félagsins sem ber yfirskriftina Projects Across Borders. Ráðstefnan, sem haldin verður á ensku, fjallar um þær áskoranir sem verkefnastjórar sem starfa í alþjóðlegu umhverfi standa frammi fyrir. Fyrirlesarar ráðstefnunnar eru jafn ólíkir og þeir eru margir, sérfræðingar úr röðum IPMA, ráðgjafar, háskólakennarar og verkefnastjórar úr ólíkum greinum atvinnulífsins, en allir eiga þeir það sameiginlegt að hafa stýrt eða komið að alþjóðlegum verkefnum. Fyrirlesarar á ráðstefnunni eru bæði innlendir sem erlendir en þeir eru: Birgitte Schaden, David Lynch, Finn Djurslev, Miles Shepherd, William Duncan, Ólafur Loftsson, Gísli H. Guðmundsson, Kolbrún Hrafnkelsdóttir og Rafn Kjartansson.  Skráning er hafin á www.verkefnastjornun.is.   

Verkefnastjórnunarfélag Íslands á Facebook.

 Stofnaður hefur verið hópur Verkefnastjórnunarfélagsins á Facebook og eru allir velkomnir að skrá sig og vera með, það er von stjórnarinnar að félagsmenn skrái sig og skiptist á skoðunum og komi á framfæri því sem áhugavert er á sviði verkefnastjórnunar. Allir að skrá sig í hópinn hér.

Undanfarna mánuði hefur VSF verið að vinna að skipulagningu funds aðildarfélaga alþjóðasamtaka um verkefnastjórnun (Council of Delegates - CoD). VSF er aðili að alþjóðasamtökunum (IPMA) og er nú í fyrsta sinn veittur sá heiður að standa að skipulagningu og vera gestgjafi CoD, það er markmið félgagsins að skipulagning fundarins og móttaka gestanna verði landi og þjóð auk VSF til mikils sóma í einu og öllu. Á ráðstefnunni sem haldin verður dagana 24.-26. september má ætla að komi í kringum 150 gestir frá 40 löndum og því í miklu að snúast hjá skipuleggjendum okkar í stjórninni þessa dagana, fundurinn mun fara fram á Hótel Loftleiðum þar sem áætlað er að gestirnir muni einnig gista. Samhliða þessu mun haustráðstefna VSF fara fram þann 23.september og verða þar í boði virkilega spennandi fyrirlesarar, yfirskrift ráðstefnunnar er Projects Across Borders og mun hún fara fram á ensku.

Næsti hádegisfyrirlestur verður haldinn fimmtudaginn 25.mars n.k. kl.12 í húsi Verkfræðingafélagsins að Engjateigi 9.  Hildur Ingvarsdóttir, verkefnastjóri hjá Orkuveitu Reykjavíkur mun fjalla um stórt verkefni sem hún hefur með höndum en það snýst um uppbyggingu fráveitu á veitusvæðum OR á Vesturlandi og hefur staðið frá árinu 2006. Hildur mun fjalla um rekstur verkefnisins á bjartsýnum tímum sem og krepputímum og þær breytingar sem þurft hefur að gera á keyrslu verkefnisins til að aðlagast breyttum efnahagsaðstæðum. Eins kynnir hún stuttlega Sharepoint verkefnavef sem þróaður hefur verið hjá Orkuveitunni og hefur reynst vel sem upplýsingamiðlun og stjórntæki í verkinu.  Skráning fer fram hér. 

Ný stjórn VSF var kosin á aðalfundi 25. febrúar síðastliðnum. Dirk Lubker, Erla Sigríður Gestsdóttir, Ásdís Elva Guðmundsdóttir,  Eyjólfur Bjarnason,   Þórir Jónsson, Sunna Reynisdóttir og  Ylfa Thordarson mynda nýja stjórn. Varamenn í stjórn eru Haukur Óskarsson og Aðalheiður Sigurðardóttir. Reynir Sigurðsson, Kristján Arinbjarnar, Eva Yngvadóttir, Viktor Steinarsson og Nína Rolfsdóttir gáfu ekki kost á sér lengur í stjórn. Kristinn Eiríksson starfsmaður Landsvirkjun Power kynnti fyrir fundarmönnum framkvæmdir við Búðarháls sem ráðgerðar eru þetta árið ásamt þeim stjórnunarháttum sem til staðar eru hjá LVP í verkefnastjórnun.  Skýrsla stjórnar er aðgengileg hér.  

Aðalfundur Verkefnastjórnunarfélagsins verður haldinn 25.febrúar n.k. kl. 17 í húsakynnum Landsvirkjunnar að Háaleitisbraut 68.  Skráning er hafin hér.  Dagskrá verður send út þegar nær dregur fundi.

Þann 28.janúar síðastliðinn stóð Verkefnastjórnunarfélag Íslands fyrir heimsókn til Íslandsbanka. Á móti gestum tóku Unnur Helga Kristjánsdóttir gæðastjóri Íslandsbanka og Viktor Steinarsson verkefnastjóri hjá Hugbúnaðarlausnum. Fyrst fjallaði Unnur Helga um starf sitt sem gæðastjóra bankans og hvernig það hefur gengið að koma á fót gæðadeild og hefja vinnu við að lyfta gæðamálum bankans á hærra plan. M.a. fjallaði hún um aðdraganda þess að starf gæðastjóra var sett á fót en það er ein af þeim afurðum sem kom útúr stefnumótafundi bankans í upphafi ársins 2009. Viktor fjallaði um þróun verkefnastjórnunar innan hugbúnaðardeildarinnar. Í stuttu máli þá kom fram að verkefnastjórar innan deildarinnar eru að vinna bæði eftir hefðbundnum aðferðum verkefnastjórnunar ásamt því að beita Agile verkefnastjórnun, en síðastliðið haust var tekin sú ákvörðun að innleiða Agile og Scrum vinnuaðferðir við þróun og stjórnun í verkefnum.

Íslandsbanki verður heimsóttur 28.jan kl.17. 

Unnur Helga Kristjánsdóttir gæðastjóri Íslandsbanka mun fjalla um gæðamál innan bankans og Viktor Steinarsson verkefnastjóri mun fjalla um Agile verkefnastjórnun hjá hugbúnaðardeild bankans.Fyrirlesturinn verður haldinn á Lynghálsi 4, 3.hæð, þar sem tölvudeild Íslandsbanka er til húsa. Boðið verður uppá veitingar.

 Skráning fer fram hér.

Í tilefni af 25 ára afmæli Verkefnastjórnunarfélagsins, þá ákvað stjórn þess að hitta einn stofnfélaga þess og heiðursfélaga, Morten Fangel, (framkvæmdastjóra danska Verkefnisstjórnunarfélagsins).  Morten er Íslendingum að góðu kunnu fyrir framlag sitt til greinarinnar hér á landi í formi kennslu og ráðgjafar, en hann heimsækir landið reglulega.  Félagið ákvað í tilefni af tímamótunum að hitta Morten og veita honum viðurkenningu fyrir sitt framlag og þakka góð störf í þágu félagsins í gegnum tíðina.  Myndirnar eru teknar af þessu tilefni.